Conta o Jornal de Brasil do domingo que un dos mellores negocios
das últimas poxas de arte foi a venda dunha valiosa colección de tres
mil fotos e postais antigas de Río, unha das cidades máis fotografadas
do mundo, desde que en 1840 o abade francés Louis Compte, de paso por
aquí, desembarcou co invento e fixo tres daguerrotipos, os primeiros en
toda América do Sur.
Segundo José Inacio Parente, autor do filme Río
de memorias sobre a historia da fotografia na cidade, as
espectaculares paisaxes urbanas foron sempre a maior atracción para
estes novos artistas da cámara escura, simples afeccionados ás veces,
como José Batista Barreira Viana, de quen se acaba de coñecer unha
foto súa datada entre 1897 e 1903, na que aparece o inmenso areal case
deserto que era daquela a praia de Ipanema e o camiño de terra por onde
cruzaban tranvías tirados por mulas. Di a lenda que a bailarina Isadora
Duncan, encantada coa natureza do lugar, entre a Lagoa de Freitas e o
mar aberto, danzou alí núa para o escritor João do Río.
Aínda que ultimamente resulta máis
frecuentada a praia da Barra da Tijuca, Ipanema, "augas perigosas"
en lingua tupí —o mar é relativamente bravío—, continúa a
ser a favorita por tradición, quizais por pura inercia, e é nela onde,
para xornais e revistas, o verán "acontece", atentos sempre os
periodistas aos comportamentos, costumes e novidades dese escaparate de
corpos dourados de sol que polas súas areas desfilan. Pero non foi
sempre así. Ignorada ata o fin dos anos cincuenta, conseguiu despois
substituir a Copacabana e desprazar máis ao sur os lugares preferidos
da bohemia e dos intelectuais que nun feliz delirio chegaron a proclamar
no famoso Pasquim radical que publicaban, a República
independente de Ipanema. E sobre todo, a praia quedou asociada para
sempre á música da bossa nova, o territorio onde reinaban os
indómitos e tan chorados Tom Jobim e Vinicius de Moraes.
Nestes días de calor tórrida do verán, o
mellor programa das vacacións do carioca segue sendo, coma sempre,
botar o día na praia. O domingo é unha boa ocasión para vir aquí, á
de Ipanema, pois aínda se celebra no barrio —praza General Osorio,
Rúa Visconde de Pirajá— a feira hippie, agora máis no
nome que na realidade, unha reminiscencia dos floridos anos setenta, na
que sempre hai algo que atopar. Con tanta calor moita xente aproveita
para ir a praia á tardiña, cando a temperatura é máis fresca, a
gozar da maxia do lugar. Este verán renaceu o curioso hábito, perdido
hai máis de vinte anos, agora rito diario dunha multitude de
emocionados fieis, de aplaudir o solpor, cando arredor das oito a enorme
bóla laranxa, vermella, se mergulla no mar preto da montaña Dois
Irmãos . |
BVG
Atrás
Índice de Páxinas
Páxina Seguinte
Ir ao índice de Páxinas