A
vinte días do carnaval as escolas de samba de Río continúan cos
ensaios nos seus barracóns e ultiman os preparativos para a
presentación das súas ricas e orixinais fantasías. A "Unidos de
Viradouro", escola tradicional da cidade de Niteroi —na outra beira
da baía— e campiona o ano pasado co seu delirante "Bing-Bang, a
explosión do universo", anunciou que está buscando un "home negro,
bonito e que saiba sambar ben" para personificar un dos tres Orfeos
cos que vai contar o seu desfile.
A idea de se inspirar na mitoloxía grega
xurdiu do famoso artista carnavalesco Joãsinho Trinta, que sempre
soñou con retomar a apaixonante e tráxica historia de amor entre Orfeo
e Eurídice desde que en 1959 viu a película Orfeo Negro do
francés Marcel Camus, baseada nunha peza teatral de Vinicius de Moraes
que levou ese ano a Palma de Ouro de Cannes e o Oscar ao mellor filme
estranxeiro. Precedida dunha fama inmerecida, decepcionoume moito cando
a vin —xa hai tempo—, pois non deixa de ser un folclórico e
superficial documental sobre a vida nas favelas, onde vivía Orfeo, e o
carnaval carioca; non está, nin moito menos, á altura do texto de
Vinicius nin, por suposto, da marabilhosa música composta especialmente
por Tom Jobim e Luis Bonfa.
Este ano abrirá, pois, o desfile dos máis de
tres mil compoñentes da escola de Viradouro unha carroza alegórica
levando ao Orfeo finalmente seleccionado sobre unha favela montada como
un Olimpo. Xa están confirmados os outros dous que farán tamén o
personaxe mitolóxico e representarán o seu talento musical; o
vocalista Tom Garrido e o mestre Jorjão, sambista desde os seis anos —ten corenta e
dous— e un grande innovador que xa conquistou ao
público o ano pasado cando introduciu o funk no ritmo da
fabulosa orquestra de percusión de trescentos membros que dirixe. Este
ano insistirá no mesmo e, adiantou, fará tamén unha homenaxe á
"cuíca",
un instrumento tradicional de percusión, de orixe africana e son
áspero e algo cavernoso, inxustamente esquecido nos últimos anos.
Ademais, o cineasta Cacá Diegues, o de Tieta
do Agreste, aproveitará o desfile da escola para filmar imaxes —fermosa
metalinguaxe— dunha nova versión actualizada da famosa película.
Nela, Tom Garrido interpretará o papel do compositor dunha ficticia
"Unidos
da Carioca" e a música será gravada por Caetano Veloso —a súa
muller Paula Lavigne é a productora— en fértil colaboración con
Jorjão. Pero a preocupación do mestre non vén pola música, senón
por saber que no desfile morrerá atacado polas bacantes, furiosas polo
desprezo que aos seus requirimentos amorosos lles fai, segundo conta a
lenda, un Orfeo desconsolado por perder por dúas veces a súa amada
Eurídice. O seu corpo será brutalmente desfeito en anacos polas
vingativas ménades, entre elas a súa propia esposa. "Non me gusta
esa historia de ser despezado pola miña muller", declarou divertido,
"¿será
que iso significa algunha cousa?" |
BVG
Atrás
Índice de Páxinas
Páxina Seguinte
Ir ao índice de Páxinas