Para
soportar mellor estes días infernais de calor do verán austral, José
Hugo Celidonio propón no xornal O Globo unha sinxela receita,
que moitos cariocas coñecen ben gracias ao filme Mujeres al borde de
un ataque de nervios de Almodóvar, de grande éxito aquí, e que
non e máis que unha versión do gazpacho, a máis tradicional sopa
fría andaluza (común tamén a Estremadura e ao Alentexo portugués),
feita nunha licuadora a base de pepino, cebola, tomate, pementa branca,
pan, aceite e, se se quere, un dente de allo («só se vostede non vai
namorar ou se a namorada pensa tomar tamén o gazpacho», aclara o
xornalista).
No Globo do mesmo día, recóllese
casualmente a orixe da difusión no Brasil deste prato nun comentario de
Agamenón Mendes Pedreira que leva por título Chico Recarey,
xusto ao pé dunha foto de Marlon Brando caracterizado como O Padriño
na famosa película de Coppola. Natural da parroquia de Agualada, en
Coristanco, nas terras de Bergantiños máis próximas a Santa Comba, de
onde proceden uns oitocentos emigrantes galegos que viven na actualidade
en Río de Xaneiro, Recarey é nomeado gran figura da semana.
Criado nunha familia moi humilde e coas poucas
letras que lle puido ensinar o veciño párroco de Couso, chegou hai
case corenta anos a Brasil sendo hoxe un dos empresarios máis
importantes da cidade, propietario de varios restaurantes, hoteis e
salas de festa, algunha de tanta sona coma a xigantesca Scala,
atracción máxima do turismo máis fácil de axencia. O chamado rei
da noite non conseguiu, sen embargo, deixar de se ver envolto a
miúdo en turbios asuntos, algúns pendentes aínda de xuízo e que
explican o malicioso comentario do xornal: «Este gran home da noite»,
sinala Agamenón Mendes, «foi o gran responsable da introducción nos
restaurantes españois [debería ter dito galegos] en Río de Xaneiro,
do gazpacho andaluz, ademais da paella valenciana e do arroz con
brócoli, marabilla culinaria que acompaña calquera cousa. Os
restaurantes españois foron tamén responsables da introducción dos
"flambados" na gastronomía carioca. Cada ano, Chico Recarey insiste
en "flambar" o Scala», lembra o xornalista, «para desespero das
compañías de seguros». |
BVG
Atrás
Índice de Páxinas
Páxina Seguinte
Ir ao índice de Páxinas