Adriana Bonfim Gregorio, de vintecinco anos, desempregada e nai dun neno
de catro, chegou a vivir unha grave crise matrimonial cando hai tres
meses o seu home, vixilante nun edificio de São Paulo, soubo que estaba
embarazada e acusouna de non ter tomada "a pílula". Paloma Riberto
Trepin, profesora de trinta e cinco anos, desempregada e separada desde
hai dous, acaba de vender o seu coche, o aparello de son e outros bens
para se enfrontar tamén a un embarazo que, ademais de non desexado, é
de risco, xa que espera xemelgos e padece de hipertensión e diabete...
Un acontecemento inesperado trastocou as súas
vidas, pero non foi por falta de información. Son dous dos casos, da
ducia coñecida ata agora, de mulleres brasileiras, a maioría do barrio
pobre de Mauá na grande São Paulo, que tiveron a desgracia de
recorreren como método anticonceptivo aos anovulatorios "Microvlar",
os máis usados no Brasil e distribuídos polos laboratorios Shering de
São Paulo, unha filial da multinacional farmacéutica alemana que acaba
de verse envolta nun escándalo de falsificación de medicamentos. Ao
parecer, en varias farmacias do país foron vendidas caixas con
anticonceptivos que en realidade non eran máis que pastillas inocuas
que contiñan fariña triga.
Fóra das actuacións xudiciais, a reacción do
goberno foi inmediata: mandou retirar das farmacias os lotes de
comprimidos fariñentos e actuou con dureza contra a Shering,
prohibíndolle vender todos os seus productos mentres non cambie os
procedementos actuais de fabricación, ao mesmo tempo que lle abría un
expediente para inspeccionar as contas. O lamentable episodio provocou
que as cámaras lexislativas aprobasen ás presas unha nova lei pola que
a falsificación e adulteración de medicamentos e alimentos serán
castigadas desde agora con penas de quince anos de cadea, sen
posibilidade de pagar fianza, trinta en caso de morte, contemplándose
ademais a indemnizacións dos afectados. É máis que unha sospeita a
existencia de organizacións criminosas que operan neste campo e,
segundo a Secretaria Nacional de Vixilancia Sanitaria, un 5% do total de
medicamentos vendidos teñen a súa fórmula alterada.
A matriz da empresa Shering en Berlín
respondeu á acusación cunha nota oficial na que se considera víctima
dunha explotación política e electoralista do escándalo. Segundo a
súa versión, as pastillas vendidas eran simples placebos que estaban a
utilizar para probar nunha nova máquina de empaquetado e que alguén,
por neglixencia, sabotaxe, vinganza ou roubo, desviou ao mercado.
Para o Ministro de Saúde, José Serra, a
Shering debe responder por non controlar a producción e distribución
dos seus medicamentos. Coa agravante da reincidencia: hai dous anos un
paciente de cancro de próstata morreu despois de inxerir "Androcur"
adulterado, fabricado por ese laboratorio. Ademais, preguntámonos co
ministro, se os anticonceptivos que se venderon fosen placebos, ¿para
que levaban o prospecto, que aquí en Brasil chaman bula? |