Saio
de Salvador co desembarque dos primeiros turistas da temporada alta e
regreso a Río. As bruxas andan soltas. Son unhas bolboretas que
nesta época voan por toda a cidade e entran nas casas á noitiña
atraídas pola luz, anunciando á súa maneira o comezo do
verán. No hemisferio sur o cambio de ano resulta moito máis
convincente porque coincide coa chegada da calor e das longas vacacións
escolares. Coma sempre, o novo ano será recibido por unha multitude de
xente en todas as praias cariocas, en especial na de Copacabana, onde xa
se está a preparar o popular e xigantesco réveillon da
Noitevella.
Hai agora dez anos, lémbrome ben, a
celebración viuse traxicamente interrompida polo accidente do Bateau
Mouche IV, un barco de recreo que partira dun peirao da enseada de
Botafogo e se dispoñía a celebrar o Aninovo no mar, cando unha forte
onda o fixo virar por completo. Morreron cincuenta e cinco persoas.
Sóubose despois que levaba xente de máis, que non había salvavidas
dabondo e outras irregularidades... Puido evitarse quizais o afundimento
do iate, propiedade dun grupo de empresarios da colonia galega que
deberon enfrontarse aos tribunais. A polémica sentencia do xuíz Jazmin
Simões Costa absolveu a todos os reos.
Pero as familias das víctimas continuaron a
súa particular cruzada e algúns dos sobreviventes decidiron contratar
avogados e investigar pola súa conta as noventa empresas do grupo. A
Xustiza deulles en parte a razón: no ano 1991 o galego Faustino Vidal
Puertas e o portugués Alvaro Pereira da Costa foron condenados a catro
anos de prisión en réxime semiaberto por "homicidio culposo", pero
despois de varios meses de cumprimento da pena fuxiron. Tamén
desapareceron os outros cinco socios, despois de que se pedira para eles
a prisión preventiva, acusados pola Xustiza federal dun grave delicto
fiscal, falsificación de documentos e asociación para delinquir.
Hai varios días o xornal O Globo
destapou en varias reportaxes algo que moita xente sabía: que dous
deses empresarios, foraxidos da Xustiza brasileira, viven na actualidade
en Galicia e continúan ao fronte de varios negocios. Trátase do
devandito Faustino Vidal Puertas, localizado polos xornalistas
brasileiros en Pontevedra, e Avelino Fernández Rivera, o que foi varios
anos presidente da Federación Galega de Empresarios no Exterior
(Fegaex) e que vive entre Ourense e Vigo.
A reacción das familias das víctimas ao
coñeceren a noticia foi de grande indignación e de frustración pola
impunidade constatada e polo que supón de crise do sistema xudicial e
de inoperancia da policía. O ministro de Xustiza Renán Calheiros, que
se reuniu cos afectados, que gañaron nos tribunais o dereito a unha
indemnización, declarou que xa informou á Interpol para que prenda aos
acusados e ten previsto pedir a extradicción a España, aproveitando o
Tratado asinado en 1990 entre os dous países, que permite, ademais, a
aprensión de bens.
A extradicción dun cidadán español a Brasil
vai ser difícil. Para un dos sobreviventes da traxedia, o ex ministro
Aníbal Teixeira, que perdeu a muller e tres parentes no naufraxio,
sería lóxico, xa que España está a loitar pola extradicción de
Pinochet, pedir a destes foraxidos para que veñan ao Brasil, respondan
polos seus delictos e se poidan defender como é o seu dereito*.
___________________
* Este foi o único artigo que non
quixo publicar O Correo Galego. |