No
estado nordestino de Alagoas, un dos dous pequenos situados entre Bahía
e Pernambuco, chegou a gobernador nas últimas eleccións Ronaldo Lessa
un enxeñeiro civil militante do Partido Socialista (PSB), que destacou
pola súa exemplar xestión como alcalde da capital Maceió. Constituíu
todo un fito a súa elección por ser alguén que, por primeira vez na
historia do estado máis conturbado da política brasileira, non
pertence á oligarquía dos facendeiros locais. Os desafíos que debe
afrontar son grandes: Alagoas perdeu boa parte das colleitas, a base da
súa economía, pola prolongada seca, ten as contas públicas en
vermello e desángrase cos continuos crimes políticos, unha colección
de traxedias que marca a súa historia contemporánea e lle dá a
horrible fama, ben gañada, que ten.
O último crime aconteceu o pasado 16 de
decembro en Maceió. Foi asasinada (xunto co seu marido e outros tres
parentes) a recentemente reelixida deputada federal Ceci Cunha, unha
xinecóloga de corenta e nove anos, filla de agricultores, que era o
principal apoio nesta rexión do partido Socialdemócrata (PSDB) do
presidente Fernando Henrique Cardoso. Ceci Cunha comezou a súa carreira
política como concelleira nos municipios de Feira Grande e Arapiraca, a
segunda cidade do estado, famosa polas súas inmensas plantacións de
tabaco, e foi a primeira muller en representar a Alagoas no Congreso de
Brasilia. Na pasada campaña electoral falaba sempre nos seus discursos
das dificultades de facer política nesas terras do sertão e do
agreste.
O pasado venres o delegado da Policía Civil
que dirixe as investigacións entregou ao Ministerio de Xustiza e á
comisión creada para este caso na Cámara de deputados de Maceió, un
relatorio de máis de cen páxinas, feito en coordinación coa policía
federal, que contén, ao parecer, elementos abondos para incriminar como
autor intelectual da matanza a Talvane Alburquerque, deputado federal
polo partido coligado da Frente Liberal (PFL) e xa desde o principio o
maior sospeitoso por non ser reelixido e pasar a ser o primeiro suplente
para substituir a Ceci Cunha, trala súa morte, o próximo 1 de
febreiro.
Para culpar a Talvane e pedir a súa prisión
preventiva, a policía baséase fundamentalmente na declaración de
Augusto Farias, outro deputado do mesmo partido (irmán, por certo, do
tamén asasinado conselleiro do ex presidente Fernando Collor) quen
afirma que Talvane contratou ao pistoleiro Mauricio Gomes Novães para
matalo a el —achega unha grabación ilegal dunha suposta conversa
telefónica entre eles—, pero como anda sempre moi protexido,
decidiu eliminar a víctima máis fácil, tendo en conta que asumiría
igual a vacante na Cámara.
Chamou moito a atención a reaparición en
escena de Mauricio Gomes Novães, un home que pasou trinta dos seus
cincuenta e oito anos fuxindo da policía, por cometer varios crimes, xa
prescritos, e ser un dos máis famosos pistoleiros profesionais da
rexión, o chamado Chapeu de couro por usar un así. Bo
coñecedor dos pronfundos meandros do sindicato do crime, presentouse
voluntariamente a declarar contra Talvane, a quen acusa de querer
contratalo para matar algún deputado. Parécese moito ao Antonio das
Mortes, o personaxe da película de Glauber Rocha Deus e o diabo na
terra do sol (1963), que tamén exercía o oficio de matar por
encarga. Debe ser unha tradición local. Ou cousa de familia, pois o pai
de Mauricio e dous dos seus irmáns —ao máis vello Floro, chamábanlle
"o terror do sertão"— foron tamén asasinos profesionais. Ah,
esquecíame, tamén o seu sogro. |
BVG
Atrás
Índice de Páxinas
Páxina Seguinte
Ir ao índice de Páxinas