v1xggsurrealismo002.html
1. Para unha historización do
surrealismo.
Se ben é certo, como afirmaba Hans Arp, que "só os
imbécis e os profesores españois poden interesarse nas
datas", usarémolas ás veces neste traballo, mesmo ao risco
de cansar ao paciente lector, mais son necesarias, non por aquilo
de quen foi o primeiro ou o segundo, senón para sabermos que hai
problemas que se pensan se puxeron hoxe e son de hai xa máis de
70 anos. Para comezarmos con elas, diremos que o surrealismo ten
data fixa de nacemento: novembro de 1924, cando André Breton
publica O manifesto do surrealismo (coñecido despois
como Primeiro manifesto). Mais como todo acto humano, o
surrealismo ten unha historicidade, non é eterno, aínda cando
no escrito de disolución do movemento -da súa sección
francesa, véxase máis adiante- Jean Schuster chega a falar dun
"surrealismo eterno". O surrealismo ten unha
historicidade, evidentemente, ora ben, tamén é certo que a súa
historicidade radica nos poemas dos homes e mulleres que
pertenceron ao grupo, que configuraron -coa súa poesía e súa
pertenza- a utopía surrealista. Por iso, quizais, unha
verdadeira historia do surrealismo debera ser unha análise do
político dos seus poemas ao longo dos anos -e, claro, dos
manifestos e intervencións individuais e colectivas. Ou, tal
vez, como demandaba Breton, a verdadeira historia do surrealismo
sexa aquela que narre as vicisitudes da escrita
automática. Non é ese o traballo que nos trae hoxe, senón un
moito máis sinxelo: unha periodización do movemento surrealista
desde o momento en que comeza a dar os primeiros pasos -un pouco
antes- até o momento da súa disolución oficial.
Nos distintos historiadores do
movemento, que son multitude, de Maurice Nadeau -o segundo por
orde de aparición- até Jacqueline Chénieux-Gendron (persoa
para quen o surrealismo é unha bolsa, como para Henri Béhar,
Michel Carassou, etc., que dirixen diversas revistas
universitarias dedicadas integramente ao surrealismo), pasando
por Claude Abastado, Juan-Eduardo Cirlot, Durozoi e
Lecherbonnier, Robert Bréchon, etc., as divisións están
feitas, maiormente, a partir de feitos exteriores ao movemento,
aínda cando os acontecementos que se suceden dentro do
surrealismo estexan presentes.
Nós propomos, desde unha
perspectiva que ten tanto que ver co movemento, é dicir, co que
René Lourau chama Variábel Orientación (9), é dicir,
os fins, obxectivos, estratexia, mito que fai existir o movemento
no plano ideolóxico, como coa variábel Período, ou sexa,
duración, histórica, fases personais, sen esquecer a variábel
Velocidade, que ten que ver coa velocidade de aparición do
movemento, o seu ritmo de desenvolvemento e mais a súa
institucionalización, se esta existe, a seguinte división:
1) 1918-1923. Período dadá; cara ao movemento surrealista
(1921- 1923): o movemento dadá que nacido en Zurich
desenvólvese en Francia a partir da chegada de Tzara a París a
finais de 1919. Rotos os vínculos con dadá, unha parte dos seus
membros oriéntase cara a Breton máis que cara á Tzara:
período dos "soños".
2) 1924-1929. Primeiro período do movemento surrealista, marcado
polas personalidades de Breton, Aragon, Éluard, Péret, Artaud,
Crével, etc. Outros grupos relaciónanse co movemento: Clarté
(Bernier, Crastre, Fourrier, etc.), Le Grand Jeu (Vailland,
Daumal, Sima...), Philosophies (Friedman, H. Lefebvre,
Politzer, etc.). Aparición de grupos surrealistas en Bélxica
(Nougué, Souris, Magritte, Goemans, Chavée, Dumont, Lecomte,
etc.) e Iugoeslavia (Dedinac, Matic, Ristic, Popovic, Davico...).
Ingreso no Partido comunista. Nacemento e/ou aparición de
diferentes grupos e revistas que se reclaman do surrealismo ou se
enfrontan indirectamente a el: Le grand Jeu, Cahiers du Sud,
Varietés, etc., sen formar parte do grupo central Parisino.
3) 1930-1939. Extensión do movemento: Checoslovaquia, Arxentina,
España (Canarias), Chile, Xapón, Exipto, etc., ruptura no grupo
inicial e rexeitamento a colaborar co Partido Comunista.
Achegamento ao trosquismo.
4) 1940-1945. Ocultación do movemento debido á guerra mundial.
Actuacións individuais ou semi-colectivas en Nova York, México,
Lima, etc.. Francia: grupo La main à la Plume.
5) 1945-1966. Resurrección do grupo até a morte de André
Breton.
Resurrección do grupo Parisino a partir de elementos novos
reunidos arredor de Breton e Péret: Bédouin, Schuster, Joyce
Mansour, Silberman, Legrand, etc.. Colaboración (e ruptura) con
diferentes movementos nacidos á sombra do surrealismo: Phases,
Internacional Situacionista, movemento Letrista, e
aparición de movementos surrealistas "disidentes" e/ou
revisionistas, Front Noir, RuPtUrE. Aparición do Grupo
Surrealista de Lisboa (1947) e en 1948, produto dunha ruptura no
interior do Grupo, nacemento do Grupo disidente, formado por
Mário Cesariny, António Maria Lisboa, Artur do Cruzeiro Seixas
e Mário Henrique Leiria, entre outros. Aparecen tamén grupos en
Romenia: G. Luca. Trost, etc. Holanda, Inglaterra, Estados
Unidos, Mundo árabe, etc.
1966-1970. O grupo sen Breton. Disolución do grupo. Difusión
inesperada do surrealismo a partir da revolta Parisina de maio de
1968.
(A periodización está feita a partir do grupo francés, que é
o que se disolve en 1969. Hoxe aínda hai grupos surrealistas (10)
en Australia, Buenos Aires, Dinamarca, Estados Unidos, Grande
Bretaña, Holanda, Madrid, Grupo de París -entre eles, o
teórico marxista Michel Löwy-, Praga, Sao Paulo, Estocolmo,
etc.)
O
CUARTO CANTO
É un home ou unha pedra ou unha árbore que vai comezar
o cuarto canto.
Lautréamont
Cando André Breton morre, o 28 de setembro de 1966, non
deixa ao movemento que fundou ningunha vía trazada.
Soamente unha adquisición, tesouro que se trata de
acrecentar ou contemplar. Os surrealistas deciden
proseguer unha actividade da que todos alviscan,
interiormente, a necesidade; criterio suficiente para
quen non ten costume decidir o seu peso en función da
solidez do termo. O mundo entra, sábese, nunha fase en
que a enerxía revolucionaria se desxela, en que formas
novas se erguen contra todas as institucións represivas.
A esperanza surrealista nunha transformación radical da
sociedade, indisolubelmente ligada á refundación das
estruturas do espírito humano, esta esperanza sempre
decepcionada, finalmente relegada á abstracción polo
que parece ser consentimento xeral, retoma vigor. O
surrealismo afronta así unha conxuntura histórica
particular da que se pode dicir que se determina ao seu
respecto por condicións subxectivas desfavorábeis (as
consecuencias da desaparición de Breton) e por
condicións obxectivas favorábeis (o renovamento do
pensamento e a acción revolucionarias).
Tense demasiada tendencia, nun caso como o presente, a
subestimar as condicións subxectivas en razón mesmo da
ilusión euforizante que cumpren as condicións
obxectivas. Cando a ilusión se esvai, os factores
disolventes acadaron o seu obxectivo. [...]
A capacidade teórica e prática do Movemento surrealista
durante o período coberto polos anos 1967 e 1968 pódese
medir principalmente pola lectura dos sete números de
L'Archibras, publicados de abril de 1967 a marzo de 1968.
Cuba, Praga, maio do 68, é a historia mesma que traza
unha vía que o surrealismo recoñece súa e na que se
empeña no presente. A grande festa colectiva (que comeza
en xullo de 1967 na Habana, se prolonga o abril seguinte
en Praga para coñecer o seu paroxismo quince días máis
tarde nas rúas de París) revela que unha esixencia
poética condiciona, en adiante, a realidade política.
O lector, o historiador, a partir dunha documentación de
fácil acceso, xulgarán se o Surrealismo, despois de
Breton e nas circunstancias que acaban de ser evocadas,
soubo estar á altura á vez do seu pasado e do
acontecemento. Mais acho, canto a min, que mesmo se o
veredito fose positivo, non podería servir de
salvaconduto para o período ulterior. Un elemento
fundamental está ausente, por definición, do dosier, o
que resulta das condicións subxectivas das que xulguei
sinalar unha compoñente decisiva: na ocasión, e para
falar claro, digo que o prezo que foi necesario pagar en
debates máis ou menos académicos, en compromisos ou
pola contra en actos de violencia para concretizar a
menor intervención, foi demasiado elevado: a
obstinación só podía desembocar nunha falacia
intelectual infamante, pensarase, certamente, que a menos
de ser monolítico, xerarquizado, burocratizado e rexido
por un sistema dogmático, cada grupo vive da libre
expresión dos seus membros, oposición ás veces
violentas e do que se chama dereito de tendencia*. Mais a
vitalidade de todo grupo depende tamén dun mínimo de
cohesión interna. Xulgo non faltar á verdade se afirmo
que é constatando a ausencia de toda cohesión interna
no Movemento surrealista que en febreiro pasado algún
dos meus amigos e mais eu decidimos abandonalo a unha
sorte que non nos concernía xa. Os que estaban dispostos
a proseguer indefinidamente unha actividade en que a
controversia permanente se introducía na menor
proposición de acción ou de reflexión sobre a menor
apreciación crítica -fosen de detalle ou de fondo- para
substituirse a fin de conta a toda búsqueda dun impacto
sobre a realidade, os que renunciaron tamén a manter
unha prática baixo unha etiqueta vacía de toda
significación, o nº 7 de L'Archibras, datado marzo de
1969, mais acabado de redactar en xaneiro, é a última
manifestación do surrealismo en tanto que movemento
organizado, en Francia. ¿O Surrealismo morreu, xa que
logo? Non.
Jean
Schuster.
*Observemos, sen embargo, que o dereito de tendencia,
lexítimo nunha organización de vocación proselitista,
convértese, nun movemento como o surrealismo, que sempre
se quixo reducido nos seus efectivos, no dereito a erixir
a ineficacia en principio.
Le Monde, 4 de outubro de 1969
|
Como
non é a nosa intención historizar o movimento -por evidente
falta de espazo- remitímonos á cronoloxía. Debemos, porén,
explicar o primeiro período, que dividimos en dous. Cara ao
surrealismo: desde 1919, cando chega Tristan Tzara (1896-1963) a
París, a finais de ano (ese mesmo ano, o grupo Parisino creara a
revista Littérature, e Andre Breton & Philippe
Soupault descubriran a escrita automática: Os campos
magnéticos) até 1921, en que se produce a ruptura con
Tzara. O inicio da ruptura estivo no Proceso a Barrès e
culminou co chamamento de Breton á reunión dun "Congreso
internacional para a determinación das directivas e a defensa do
espírito moderno", ao que Tzara se opón, con Benjamin
Péret e Paul Éluard, aínda que estes dous últimos tornan con
Breton.
A chegada de Tzara a París foi
determinante para que un grupo de escritores deixasen de ser
literatos. Á parte, o romeno, que fundara dadá en Zurich con
outros escritores e artistas, ensinou aos futuros surrealistas a
importancia das tomas de posición públicas para afirmaren unha
actitude de ruptura nas ordes intelectual e moral. Ora ben, está
por ver se dadá non retrasou o nacemento do surrealismo, debido
sobre todo á postura de Tzara, que ao contrario do que
acontecera en Zurich, actúa en París como un pallaso, quizais
por non se dar conta que o grupo Parisino, aínda que literatos,
estaba formado por mozos aos que, en palabras de André Breton,
"a guerra de 1914 acababa de privar de todas as súas
aspiracións, para guindalos nun sumidoiro de sangue,
imbecilidade e lama" (11). Tzara pasara a guerra en
territorio neutral e non coñecera a miseria nin a dor nin dos
que foran á frente, como Benjamin Péret, nin dos que actuaban
como médicos militares, aínda que non tivesen acabada a
carreira (Breton, Aragon). O rexeitamento da carnicería que
supuxo a guerra 1914-1918, era en Tzara a dun pacifista. Nos
futuros surrealistas, algo máis profundo: viran pisoteada a
condición humana en nome da patria, da relixión e da
fraternidade. ¿Como non ían os futuros surrealistas censurar as
pallasadas de Tzara cando estaban a condenar a toda unha
xeración intelectual que levara aos homes a unha morte segura?
Mais, con todo, Tzara, dadá,
ensináronlles que a arte non é nada e a literatura menos.
Porén, xa en 1916, Jacques Vaché (1896-1919), que Breton
coñecera en Nantes durante a guerra, escribía "non
apreciamos nin a arte nin os artistas". Mais a súa (a do
romeno) importancia na reconversión duns homes que ían camiño
de se converteren nas primeiras "plumas do seu tempo",
é innegábel. Ora ben, polo o seu talante un pouco
"pallasesco", non era o home que podía axudar á
construcción dunha utopía. De aí, a ruptura.
A
TRAVÉS DOS MEUS OLLOS
1º ¡Dadá morreu! ¡Dadá morreu! ¡Dadá morreu!
2º Dadá propúñase destruír, mais desfíxose el
propio antes de que a súa acción se fixese sentir.
3º Dadá non era un comezo, senón un fin.
4º A grande sedución que deitaban as ideas aportadas
por Dadá, fixo que se satisfacese con elas sen procurar
mellores. De aquí veu, rapidamente, unha imposibilidade
de transformación e a morte de Dadá.
5º A contradición que permite case simultaneamente
dúas opinións diferentes sobre o mesmo tema é dada.
6º A dúbida non pode ser dadá.
7º Non se experimenta, hoxe, máis sorpresa ao ler un
poema dadá que un poema simbolista ou cubista. Moita
xente espera que apareza o manual "a poesía dadá
en vinte licións".
8º Reverdy: unha torca oxidada; Jean Cocteau: unha
cagada de anxo; Raymond Radiguet: a pel de cagada de
anxo; Max Jacob: o corazón de Xesús: Tristan Tzara:
dadá; Man Ray: os cabelos da retina; Georges
Ribemont-Dessaignes: o cuarto de hora de Deus... (¡e non
continúo!) sentaron á sombra e dormen.
9º Guillaume Apollinaire e Marcel Duchamp espérannos.
10º Abandono as lentes dadá e, disposto a partir, miro
de onde ven o vento sen me inquietar por saber que será
e aonde me levará.
11ª Mañá, estarei aínda disposto a saltar ao coche do
meu veciño se se dispón a tomar unha dirección
diferente á miña.
Benjamin
Péret. Littérature
|
E
mentres non chega o surrealismo, os homes que o van conformar,
experimentan: o período dos soños, a prática da escrita
automática, viaxes ao chou, a pé, sen saberen que rota toman,
até que en 1924 eclosiona todo: fundación do Bureau de
recherches surréalistes, aparición de Manifesto do
surrealismo, panfleto Un cadáver, contra Anatole
France, recentemente falecido, que era para os eles a figura
típica do filisteo, aclamado pola dereita e pola esquerda. E o
1º de decembro dese ano, a aparición do número 1 da revista La
révolution surréaliste, dirixida por Benjamin Péret e
Pierre Naville.