v1xggsurrealismo012b.html
ANTOLOXÍA DE SURREALISTAS
MULLERES
Desde hai uns anos, as mulleres surrealistas están a seren
reivindicadas desde diversos puntos de vista. Hai un,
particularmente cínico e particularmente levado a cabo por
"profesoras" ou "catedráticas" de literatura
e/ou arte, que intenta enfrontar o surrealismo das mulleres, ou
as mulleres surrealistas, ao "machismo" dos
surrealistas. Non deixa de ser outra parvada de certas
institucións. Para dar a coñecer a algunhas destas mulleres,
descoñecidas fóra de círculos restritos, surrealistas ou
surrealizantes, malia que algunhas delas están, hoxe,
consideradas como grandes escritoras -ou grandes fotógrafas, ou
grandes "artistas": lease, Claude Cahun, Lee Miller,
Unica Zürn, Mimi Parent, etc.- o certo é que continúan a seren
unhas grandes descoñecidas.
A escolma é soamente literaria, non plástica, e nela entran só
mulleres que pertenceron e/ou se reclamaron do
surrealismo, ningunha delas é surrealista a posteriori, é
dicir, porque así o declarou tal ou cal historiador da
literatura ou da arte (como acontece con Maruja Mallo, que non
foi surrealista, aínda que a súa obra poida deber algo ao
surrealismo). Non están todas, mais si son as que están,
representando diversos momentos do movemento surrealista até
chegar á actualidade. Se a escolma non é exhaustiva, achamos,
por outra banda, que é representativa.
NELLY KAPLAN (Belen)
EU
SAÚDOVOS, MARIDOS
Desde hai milenios xa, vivimos de novo baixo o réxime do
matriarcado.
As mulleres gañaron a partida. E gañárona ben. A súa antiga
servidume, estamos a pagala duramente. Nós, os homes. E isto
dura desde hai milenios.
E non obstante, ás veces, teño esperanza nun cambio. Na
historia deste mundo, os días se seguen e non se parecen. E é
nos libros de historia que procuro unha razón para esperar. Son,
con efecto, un dos raros homes que aínda ama a lectura. Durante
as longas xornadas que paso recluído na casa que me foi
consignada, leo obras dos antigos. Mesmo as comprendo. Parece
que, malia a miña condición, a miña intelixencia está por
cima da media. É sen dúbida por esta razón que elas me vixían
cunha particular insistencia. Mais isto non me impide devorar
obras que, mediante iluminacións, me revelan o que era o mundo
nun afastado pasado, antes do matriarcado. Isto faime soñar. En
van. Porque nunca sairemos do noso estado. A esperanza, en
verdade, non pode ser máis que unha ilusión. Non podemos
escaparlles. Arranxáronse admirabelmente para nos daren o
esencial: o leito, o teito e mesmo o confor. Unha especie de
anestesia, en suma, unha anquilose mental que nos encarcera máis
ferreamente que grades de cadea. Mesmo non temos pensamento para
tentar unha evasión. E cando algunhas veces tento incirrar á
revolta, os meus compañeiros míranme enlouquecidos e arrédanse
de min con desconfianza, non me comprenden. Quizais me denuncian.
É o eterno masculino coas súas feblezas e as súas
vellacarías. Non podemos fiarmos do sexo feble.
Evidentemente, nesta casa de luxo e de luxuria nada falta aos
nosos caprichos. Os días decorren na dozura de nada facer, as
noites na alegría. É verdade que somos ben tratados e que nunca
-en fin, case nunca- nos castigan.
Mais eu non son feliz.
Elas sábeno. Penso aínda ouvilas:
-Nunca seras feliz, dinme. Pensas de mais. ¿Para que?, é máis
simple que te resignes. De calquer maneira, non poderás cambiar
a condición do home.
-Non se pode modificar un estado estabelecido de feito. ¿Cómo
explicas ti que os grandes creadores sexan sempre
mulleres?, engaden cunha dozura tinxida de provocación.
Teñen razón, seino. Os homes nunca inventan nada. Non crean
nunca nada sorprendente. Elas sempre teñen razón. Mesmo cando
se mostran apenadas polo noso incurábel cretinismo. Pois,,
¿cómo loitar? Milenios de atavismo esmágannos.
E os días, os meses decorren nesta casa en que son pensionista.
Desde a miña máis tenra infancia, fun iniciado en toda a
subtileza dos ritos que as mulleres veñen celebrar aquí, para
esquecer as fatigas das súas xornadas de traballo e de
responsabilidades.
A penas saído do I.D.A.E.V.* entrei en pensión. Estou, parece
ser, excepcionalmente dotado pola natureza, intuitivo cando
quero, tenro ás veces, eficiente sempre. ¿E como non selo xa
que elas preveron todo? Mesmo cando son repulsivas, estamos
adaptados para servilas. É máis forte que a nosa vontade. Ai, a
carne é feble e elas leron todos os libros. É así que as
experiencias científicas dun profesor do século XX lles
inspirou a solución soñada. Solución que foi aplicada con
éxito. No I.D.A.E.V. , durante longos anos de estudo, cada vez
que nos tornaban eufóricos -¡e elas saben como facelo!- unha
campaíña resoaba nas salas de traballos práticos. Isto nos
deu, despois de innumerábeis sesións de euforia, un reflexo
condicionado tal que ao menor eco dunha campaíña... En suma,
desde o momento en que unha muller, por pouco sedutora que sexa,
vén visitarnos, un astuto sistema de carillóns desencadeado nos
cuartos fai automaticamente de nós unha inesgotábel -ou case-
vítima maravillada.
Un día, quizais, todo cambiara de novo. Mais a miña intuición
me di que o relevo será feito por eses estraños mutantes
aparecidos despois da primeira Grande Destrución, andróxinos
inquietantes cos ollos sementados de pos de ouro. De momento,
aínda están ao noso servizo. Mais o seu estraño sorriso e a
amplitude dos seus poderes non me enganan. Nós os homes, e as
mulleres que hoxe nos dominan, desapareceremos nos séculos
vindeiros. E acho que será xusto.
Mais iso pertence ao futuro. Neste mesmo momento, pensionario
resignado que son, ouvo pasos que soben cara ao meu cuarto.
Ábrese a porta. Estou canso de mais para virarme e permanezo
indolente, deitado, os ollos fechados.
Máis unha muller...
Aproxímase e, cunha voz apagada polo abuso de licores marcianos,
saúdame. Despois, comeza a espirme. ¿É bela ou repugnante?
Supoño que é tempo de abrir os ollos para sabelo. Mais xa un
doce vertixe de carillóns me dá todas as respostas. Prefero
quedar cos ollos fechados, deixándome levar resignado e
radiante.
Non hai revolta posíbel. É novamente o matriarcado.
* Instituto de Altos Estudos Voluptuosos
BONA de Mandiargues (1926-2000)
En 1952 expuxen por vez primeira. Era na Galería Beggruen e
presentábame Francis Ponge. Xusto antes da miña houbera unha
exposición de Man Ray.
Depois, os surrealistas convidáronme. Así André Breton
propúxome participar na exposición surrealista de 1954. O que
foi para min refoncortante no apoio do grupo é o sentimento
dunha certa alianza e dunha certa calor amical. O máis
desgarrador para un artista é a solidade, ese xelo onde a
inspiración se rarifica. Cos outros, cada individuo daba do
surrealismo unha imaxe persoal, en harmonía, non obstante, co
conxunto. Como sobre un taboeiro de xadrez, eramos todos peóns,
e sen embargo cada un xogaba a súa propia partida que xogabamos
en común.
Grazas ao grupo surrealista puiden ver máis claro en min e no
que quería expresar. E pouco a pouco pequenos cadros naceron.
Tiña como únca bagaxe a pintura sienesa, os Ferrarais, de
Chirico, de Pisis, é dicir, un fondo pre-surrealista que ía
servir de base á miña tentativa. Atinxida polo espírito do
grupo, querería non controlar o meu deseño, deixarme guiar cada
vez máis polo inconsciente, explorar as cidades subterráneas, o
mundo interior do home. Quería iniciar unha psicanálise ao
servizo da arte, encontrar de novo as forzas subversivas do neno
ou do non-civilizado, pintar desta maneira o ser do home e da
muller na súa nudeza orixinal, na que cría apaixonadamente e
que procuraba sempre. No café surrealista coñecín grandes
artistas: Ernst, Bellmer, Lam, Matta... O que me pracía neles
como en Masson, Brauner, que coñecín fóra do café, era a
tendencia que tiñan todos a amar a poesía, os poemas de todas
as civilizacións, do hai-kai á epopea. Nunca separaban a
poesía da arte. Era necesario ser poetas. Era necesario pintar
ou esculpir poemas.
[...]
O grupo surrealista deume a revelación á que secretamente
aspiraba. Era unha sociedade estraña: as súas maneiras de ser
eran particulares, case só se falaba, repítoo, de poesía cousa
da que non se fala moito nos medios artísticos modernos en
Italia, fóra de Pisis, xustamente. Discutíase tamén da muller
e era a primeira vez que escoitaba xentes moi intelixentes se
interesaren polo papel da muller sen submetelo ao do home. Os
surrealistas non separaban a muller da poesía, identificábana
coa súa propia prática creadora. Estaba sempre presente moito,
máis que a "musa" dos Románticos. E que mulleres
extraordinarias as mulleres surrealistas: Elisa, a dona de André
Breton, Toyen, Leonora Carrington, Meret Oppenheim, Nora Mitrani
e mais outras... Ningunha era considerada como un obxecto. Por
primeira vez a idea absurda noutros medios, italianos sobre todo,
de ser muller artista, pintor e poeta, convertíase nunha
posibilidade, nunha promesa de maravilloso futuro.
Entre os surrealistas comprendín que a obra debía ter como
obxecto o gosto do perigo e que a muller como o home, podía e
debía arriscar o todo polo todo.
LEONORA CARRINGTON (1917)
EN
BAS*
(fragmento)
26
de agosto, xoves
Foi, case teño a seguridade, a noite que precedeu á inxección
de Cardiazol que tiven esta visión:
O lugar parecíase ao Bois de Boulogne; eu estaba no cumio dun
camiño bordado de árbores; a unha altura lixeiramente inferior,
na estrada, había un obstáculo semellante aos que vira tantas
veces no Concurso Hípico; a meu carón, dous grandes cabalos
estaban atados un a outro; esperaba con impaciencia que superasen
aquel obstáculo. Despois de longas dúbidas, saltaron e
galoparon para o fondo da encosta. De repente, un cabaliño
branco separouse deles. Entón desapareceron os dous cabalos
grandes e no camiño ficou só o poldro, que voltou para o fondo
e quedou deitado de panza ao ar, agonizante. O
poldro branco era eu propia.
Días bastante silenciosos seguiron á terríbel caída provocada
polo Cardiazol. Arredor das oito da mañá ouvía, ao lonxe, a
sirena dunha fábrica e sabía que era o sinal de Morales e Van
Ghent chamaren para o traballo os zombies e tamén para me
despertar, a min, que estaba encarregada de libertar o día.
Piadosa entraba entón cunha bandexa na que había un vaso de
leite, algúns biscoitos e fruta. Absorbía estes alimentos
seguindo un ritual especial.
1. Sentada dereita na cama, bebía
o leite dun só grolo.
2. Semi-deitada, comía os
biscoitos.
3. Deitada, absorbía toda a fruta.
4. Facía unha curta aparición no
baño, onde comprobaba que os meus alimentos pasaban sen seren
dixeridos.
5. De regreso ao leito, sentábame
novamente moi dereita e estudaba os restos da fruta: cascas e
sementes. Dispúñaos de modo a
obter deseños que representasen solucións de problemas
cósmicos. Acreditaba que Don Luís e o seu pai, vendo os
problema resolvidos no meu prato,
me permitirían ir a "En Baixo", ao paraíso.
Frau Asegurada chegaba entón para me dar un baño e despois
levábame para o cuarto do Sol. Ali, libre de todos os meus
obxectos familiares que pertencían ao pasado confuso e
emocional, e que terían escurecido o traballo que levaba a cabo,
soa e núa, co meu lenzol e o sol -o lenzol uníase ao corpo
nunha danza que concretizaba a abstracción dos números- achaba
esencial resolver o problema do meu EU en relación co sol.
Pensaba que me obrigaban a sofrer as torturas de purificación
para me levaren a alcanzar o Coñecemento Absoluto e que entón
podería vivir en "En Baixo". Aquel pavillón era para
min a Terra, o Mundo, o Paraíso -o Edén- e tamén Xerusalén.
Don Luís e Don Mariano eran Deus e o seu Fillo. Xulgábaos
xudeus e pensaba que eu, aria, celta e saxona, soportaba aqueles
sofrementos para vingar os Xudeos das persecucións de que eran
vítimas. Despois, en plena lucidez, iría para "En
Baixo", como terceira persoa da Trindade. Sentía que, polo
sol, era eu: andróxina, a lúa, o Espírito Santo, unha xitana,
unha acróbata, Leonora Carrigton e unha muller. Sería tamén,
máis tarde, Isabel de Inglaterra. Eu era a persoa que revelaba
as relixións e carregaba ao lombo coa liberdade e os pecados da
terra transformados en coñecemento, a unión do home e da muller
con Deus e o Cosmos, todos iguais entre si. A inchazon da miña
coxa esquerda parecía xa non facer corpo comigo propia e
tornábase un sol no lado esquerdo da lúa; todas as miñas
danzas e voltas no cuarto do Sol tomaban esa coxa como pivote. A
inchazón deixou de doerme, pois eu sentíame integrada no sol.
As miñas mans: Eva (a esquerda), Adán (a dereita)
comprendíansen e a súa habilidade era por fin complicidade.
Con algúns trozos de papel e un lápiz que José me dera, facía
cálculos e deducía que o pai era o planeta, o Cosmos, e estaba
representado polo signo do planeta Saturno. O fillo era o Sol e
eu a Lúa, elemento esencial da Trindade, co coñecemento
microscópico da terra, das plantas e das criaturas. Sabía que
Cristo estaba morto e acabado, que debía tomar o seu lugar,
porque a Trindade, privada de muller e de coñecemento, se
tornara seca e incompleta. Cristo era substituído polo Sol. Eu
era Cristo na terra na persoa do Espírito Santo.
*"En Baixo" (Abajo) era a aldea de Santander onde
estaba localizado o manicomio en que fóra encerrada Leonora
Carrignton en 1940, cando fuxía da desfeita francesa diante dos
nazis, por orde de seus pais, que pertencían á aristocracia
británica. O nome do lugar deu tamén o título ao libro,
escrito por Leonora Carrigton a instancias do médico surrealista
Pierre Mabille.