v1xggsurrealismo012c.html
MARIANNE VAN HIRTUM (1935-1988)
AS
METÁFORAS DA MALVADA RAPACIÑA
Agora
teño unha copa de cristal incandescente
para
o único morango dun fresco serán
Agora
teño un minúsculo frasco de perfume
para
facer brillar o morango
Agora
teño un papel de pétalos de orquideas
para
enrolar o azúcar de cevada tibia para non fumar só
Agora
teño un limpa-plumas de confusión
para
contar as perlas que vou recibir polo meu cumpreanos.
Agora
teño un delicado sillón de plumas
para
madurecer as cereixas
na
árbore do inacabado.
Agora
teño un dediño maleábel
para
seguir o rato nos seus meandros
persuadilo
con amabilidade habitual.
Agora
teño unha culleriña de mercurio
para
apañar as ampolas de madeira ao sair da boca redonda
Agora
teño un cigarriño de pluma quente:
dádeme
lume -por favor.
*
* * *
Mulleres de cabeleira nocturna -¡incendiadas! -¡duplas!
-¡temerarias! -¡loucas!
No centro de correción non hai salvaconduto. Circúlase coas
pequenas patas estreitas da velliñas do hospicio.
Abandónanse a lanzazos nunca ouvidos. As nosas cabezas teñen
forma de peras picantes e de desesperos tenebrosos. Irrita os
teus lenzois de ébano usados polas areas: unha caverna de fames
non diminúe a escala do teu desexo no ventre choído da túa
vida. Ves colocar as camisolas verdes en infortunio de nácar. O
vento tórnase dedos de cunchas para te golpear o fronte cunha
rosa de labios de metal.
E tendemos unha ponte na mar para a evasión dos pombiños orfos
do Hotel-Madame.
*
* * *
TIGRES
ENCANTADORES
Tigres
encantadores
que
acendedes a beladona
bestas
floridas de seda
afastade
de nós o perigo
que
é existir mal
non
sendo
voso
ollar debe bastar
implorante
bolla de iris
illas
negras de que a vosa roupa está saturada
cabezas
desamparadas
navegando
no ar das gaiolas
con
que silex azuis de desexos
non
pagastes
a
nosa liberdade de ser un home.
ANNIE LE BRUN (1942)
CUARTO
CERCO
Rabaños
de animais de noite revelaban o circuíto dos meus ollos. A
profundidade dos seus orgasmos pesaban no corazón das miñas
pupilas.
Vós
que me coñecedes, non marchedes á deriva das impresións:
sabedes que non son tan bela como din e que só me poño carmín
nos labios cando ten o gosto da cream rosa do crime.
Quería
que a grande caza pase pola sabana de meus cabelos para levantar
como caza o vento que nela se esconde. Alá, agachada, espero
aínda a beleza das mulleres, tendéndolles as máis terríbeis
trampas inofensivas. Caen case todas, cruelmente disolvidas na
miña memoria. As que saben raspar as pedras de toque e enfialas
en aspa, teñen dentes para aloumiñaren as vellas mordidas, pés
para fecharen docemente os ollos, ventres para escoitaren,
nádegas para invitaren a pensar.
N.B. Que os espíritos meticulosos se tranquilicen ou
enlouquezan. Ignoro todo da da experiencia psicolóxica ou
deportiva, a caza en xeral e a sensibilidade feminina en
particular.
OS
CASTELOS DA SUBVERSIÓN
(fragmentos)
Querida imaxinación, o que amo en ti sobre todas as cousas, é
que non perdoas. André BRETON.
Falei dunha certa ollada. Nacida do incríbel, surxe das máis
afastadas certidumes, na efervescencia do cuestionamento, a
impaciencia do descobremento e a vertixe da lucidez. En plena
época das Luces, é ela e unicamente ela quen vai cambiar a
paisaxe, con todas as tempestades que se coñecen. Como se as
conmocións sensíbeis preparasen as convulsións sociais e non
á inversa. Porque todo o século XVIII está minado por esta
nova maneira de ollar, antes, despois, durante os acontecementos
revolucionarios. ¿É dicir, que baixo os máis diversos
discursos comeza a actuar un mesmo e profundo movemento de
rexeitamento, estendéndose subterraneamente en nube de xorda e
afastada fermentación para dar ás propostas máis inxenuas ou
ás máis cínicas unha turbadora unidade? Unidade sen forma nin
formulación dunha sensibilidade desde entón á procura de si
propia. Unidade contraditora dun pensamento desde entón
esencialmente vítima da desmesura que o enxendra. Unidade que se
busca implacabelmente aínda hoxe baixo os escombros sucesivos
das nosas certidumes abolidas.
Seguramente, a nosa modernidade é moi vella. E esa sería,
quizais, a menor razón para non deixar que se esfumase baixo a
poeira dun decorado demodé a
radicalidade que a sustenta.
Senón, ¿por que tomar a palabra nunha cuestión que, en si, non
interesa a ninguén? ¿Por que continuar a ocuparse dun castelo
que nunca existiu e cuxa silueta fantasmática tende a se
amortecer en curiosidade literaria? ¿Cal é a actualidade dos
nosos soños? ¿Estamos tan distraidamente no mundo porque, hai
dous séculos, toda unha época se deixaba, xustamente, fascinar
en medio do torbeliño revolucionario polo mesmo castelo
vagamente gótico e totalmente imaxinario? ¿Como saber discernir
o ruído do tempo dos rumores da nosa memoria?
Sei, soamente, que o imaxinario hoxe se encontra nunha situación
desesperada. Despois de ceder demasiado ao terrorismo do real.
Despois de consentir en comedirse, parece imposibilitado para ir
máis alá, como outros tantos pasaxes ocultos na turba das
aparencias. Por outra parte, este agotamento progresivo do
imaxinario, encontra na pintura dos últimos vinte anos a súa
crónica polo miúdo, un estilo máis ou menos conseguido ou unha
idea máis ou menos brillante, que corresponden a cada etapa
decisiva desta subtil operación de "normalización".
Así, habilmente reducido á impotencia baixo unha lenta
avalancha de cousas que ocupan lentamente o espazo cunha
indecencia que o pop art expresara tan perfectamente, o
imaxinario aínda encontra a forza, nos anos sesenta, senón para
escoller os seu inimigo, si cando menos para inventar as súas
estratexias de defensa: esnaquizando os obxectos, mutilándoos da
súa función, ou ben agardando a súa progresiva destrución ou
a súa degradación natural. A exhibición dura xa hai algúns
anos, sen ser, porén, eficaz. De maneira que, desde 1970, o
imaxinario convértese na presa fascinada dun obxecto que xa non
pode aniquilar; esgótase virando ao seu arredor, aparvado e
subxugado -é o hiperrrealismo- cando non se conforma con avaliar
vergoñosamente o fragmento de espazo que as cousas disimulan. Ao
mesmo tempo, desta reflexión sobre o obxecto e a súa ausencia
escuramente desexada, nace a arte conceptual. De resultas do cal,
o obxecto perdérao todo, até a súa inxenuidade concreta, para
se converter no signo dunha retórica miserabilista. Canto á
situación actual do imaxinario, canto máis pode constatarse un
repregue (¿ou non é máis que un repregue na estratexia das
aparencias?) que deixa os obxectos e os seres estouparen de
plenitude baixo a enganosa luz da súa nova obxectividade.
¿Derrota? ¿Fuxida? ¿Eclipse? Da nosa resposta depende o noso
porvir sensíbel. Non obstante, con estas preguntas emerxe unha
lei: falto de vacío, o imaxinario desaparece. Sen dúbida porque
nunca se produciu tanto e nunca se creou menos.
Así, perante a pusilanimidade sensíbel deste tempo, consistente
cada vez máis en tomar as formas por valados e as palabras polo
simple eco dunha indispensábel represión sobre o real, acábase
por pensar que a redundancia é hoxe unha arte e mesmo a única
arte que soubo darse este fin de século. Todos os signos
chegaron a serlle intercambiábeis a forza de participaren
indiferentemente nos máis diversos planos de adaptación do
real. A penas inconscientes, case indiferentes, asistimos a unha
empresa sen precedentes de colonización dos signos. E xa non hai
territorio sensíbel, por máis remoto ou afastado que estivese,
que non se vexa un día exposto a ser tocado pola expansión
desta silenciosa neutralización.
Entón, fatigados de voltar de todo, os homes non pensan senón
en crer en non importa que. É fácil, demasiado fácil. Para ter
ilusión de liberdade, é suficiente restrinxir un pouco o
alcance das súas miras: o retorno das relixións, a resurxencia
dos nacionalismos, o descobrimento súbito dos máis asombrosos
particularismos, son outros tantos elementos que contribúen a
delimitar cada vez máis esta pel de zapa en que pode verse, cada
día, diminuír a idea de que o home se fai de si propio. E por
obra do máis ilusorio dos artificios, procúranse raíces polo
único pracer de outorgarse cadeas naturais. Progreso indudábel:
a servidume posúe hoxe razóns ecolóxicas.
O que sería soamente ridículo se non fose perigoso. Xa que se
esbara desde o irrisorio ao innobre sen darmos moita conta. E
isto pola boa razón de que tal evocación extenuante do solo
natal ou tal outro fedento cheiro da terra, son combinados coas
máis sinistras tonalidades raciais nun proxecto común
-consciente ou non, pouco importa, porque o resultado é o mesmo-
de liquidación do imaxinario. Nada máis simple, asígnase un
nome, unha orixe, un lugar, unha forma, en suma, unha identidade
ao que por definición non ten. Trátase de fixar os pensamentos
desprazados, de organizar as viaxes fantasmáticas, de cubrir a
retirada dos soños. Trátase, sobre todo, de cincunscribir o
imaxinario á viscosidade do convencional. Despois de humillalo
definitivamente, dinfrazándoo dunha vez para sempre coas solas
de chumbo do real.
Praticamente, xa non hai fantasma que non teña hoxe a súa
forma, a súa cor, o seu peso e, correlativamente, o seu prezo. O
imaxinario está a piques de morrer por esta rabia do concreto
que manifesta máis un medo pánico diante do indeterminado que
unha verdadeira paixón polas cousas. Por outra parte, é a mesma
obsesión do eventual que dirixe o espectáculo chamado
pornográfico destes últimos anos. A prática sistemática do
primeiro plano satura o espectador ao mesmo tempo que toda
perspectiva imaxinaria. Nunca foramos levados, a punto tal, na
trampa da aparencia, redundante até obstruír completamente o
horizonte. E a insignificancia deliberada dos rostros deste
espectáculo pornográfico remata a clausura da imaxe sobre si
mesma. Ningún signo para escaparmos a este choemento do
concreto. Monstruosamente presentes mais tamén monstruosamente
indiferentes, o corpos non remiten máis que a si mesmos.
Operación maxistral: quizais por vez primeira o desexo é de vez
privado da súa historia, reducido a non ser máis que un
segmento de tempo no esquema da oferta e da demanda. Que os
defensores da orde se tranquilicen: esta nova censura polo
engorde concreto é tan boa como a antiga -senón superior-
porque esta vez separa definitvamente o corpo das ideas, que só
se converten en perigosas ao se encarnaren. Así, na neutralidade
invasora dos corpos, xa non é cuestión de erotismo nin mesmo de
obscenidade que, faltos de sentido, van reunirse á revista de
accesorios. Mais ao mesmo tempo. Son os corpos que se encontran
mutilados do seu poder de encantamento como do seu poder de
ultraxe. Isto é o realismo.
Tal sería a derradeira fase dun escuro proxecto, fomentado sen
dúbida nas proximidades da posguerra polas forzas máis
diversas, mesmo antagonistas, para impór unha visión realista
(en todos os sentidos do termo) do home e do mundo. Dirixida por
esa sinistra reacción de celador ou de burócrata contra a
turbulencia, a insolencia, a loucura de entreguerras, a vida
intelectual e sensíbel, apenas con algunhas gloriosas
excepcións, traballou activamente neste sentido: do
existencialismo ao estruturalismo pasando polo realismo
socialista e o hiperrealismo, poderíanse encontrar os momentos
determinantes desta xorda e progresiva incautación do realismo
sobre o imaxinario. Até tal ponto foi así, que o noso marxe de
manobra é hoxe dos máis restrinxidos. Eisnos as costas contra o
muro e o fronte contra o real. ¿Sabemos aínda encontrar
paisaxes imaxinarias a través dos espazos improbábeis que
habitamos?
E non obstante, novos horizontes, paisaxes fantasmáticas,
obxectos imaxinarios, pouco importa a denominación, non existe
ser que non procurase e encontrase, de neno ou máis tarde, a
orixe da súa respiración mental. Os obxectos imaxinarios son
necesarios para a nosa supervivencia. Só que o seu segredo de
fabricación comeza precisamente a se perder, sen que en verdade
nos deamos conta, no deslumbramento do instante, a rapidez dos
circuítos, a inflación das imaxes. Neste sentido, tanto do
pasado como do futuro non temos nada a esperar. É o momento
crucial para mirar o aspecto da inactualidade, alá onde se fai a
eterna a mocidade dos nosos desexos. Entón, ¿cómo non ser
fascinado por unha época que, en medio da tempestade
revolucionaria, soubo situar, como obstáculos incesantes
inflexíbeis na encrucillada das ideas motrices, os seus
desafíos imaxinarios? Xigantesca máquina produtora de silencio
no zunzún ideolóxico do século XVIII, o castelo da novela
gótica é un dos raros momentos históricos a visitar
urxentemente. Pois é dunha ardente actualidade.