v1xggasurrealismo012e.html
NORA MITRANI (1921-1961)
DAS ESCRAVAS, DAS SUFRAXISTAS, DO LÁTIGO
"A muller é un ser humano". Lin este profundo
pensamento en Royaumont, nun libro titulado Phénoménologie
de la femme, de cuxo autor non sabería citar o
nome, pois a miña memoria -por razóns bastante claras despois
de todo- negouse a rexistrar o seu nome. Unha afirmación tan
perentoria non debería provocar o sorriso en ninguén, ás
mulleres menos que a outros. Despois de todo, isto merece unha
reflexión e quizais desde o primeiro día da creación do mundo
está por probar que a muller non é unha gacela ou unha pobre
gata ou un cérebro de paxaro ou unha fermosa planta ou unha
porta do inferno ou unha fada ou unha perdición. ¡Sobre todo,
non tentedes probar sexa o que sexa!, berrarán talvez algunhas
mulleres. ¡Non nos traizoedes así! ¿E se isto nos dispón a
deixar de seren consideradas como gatas ou fadas? Noso quiñón
nunca foi tan bo como cando o home, ese ser humano, nos trata de
animaliños encantadores que é necesario vestir, aloumiñar e
perfumar. Se sospeita que pertencemos á mesma especie que el,
entón, en menos de que canta un galo, ¡hop!, eisnos cinxidas
con uniformes que nos mancan os seos, eisnos calzadas con botas
militares, desfilando nos mornos desertos de Israel, nos desertos
de China, nos desertos da URSS, ouveantes, afeadas polo
patriotimo e a inmundicie. En verdade, ¿desexariades iso? Non,
mellor é non probalo.
Non pedimos máis. Soamente existe unha raza de mulleres intelixentes
que, cotidianamente, mediante teses filosóficas, por accións
escandalosas, conquistas xurídicas, tentan demostraren que
posúen cérebro e nervios constituídos como os dos homes.
Érguense, afírmanse, fundan ligas de virtude americanas e
dirixen empresas metalúrxicas*, fanse enxeñeiros, lóxicos
expertos, maxistrados, electricistas, ministros e sobre todo
presidentes de todo o que se pode presidir. Non necesariamente
feas (pretendelo testemuña xa a misoxinia fundamental, non só
do home, senón tamén das belas mulleres un pouco paralizadas,
que se defenden como poden contra as que posúen outros trunfos
que a beleza), ostentan non obstante certa desenvoltura respecto
da beleza física. Se unha destas presidentes posúe, ademais, a
arte de elixir o carmín dos labios que harmoniza coa tinta dos
seus belos ollos, provocará un sentimento de estupor infinito e
racharán, ameazarán os vellos prexudicios dun uso tan cómodo:
a disociación nas mulleres da beleza e da autonomía espiritual,
co pretexto que esta só servirá para compensar a infelicidade
experimentada a causa dun rostro sen graza.
¿Cómo? ¿Permítese ademais ser fermosa? Si, vede esa boca,
eses nocelos de bailarina española... a presidente, a ideólogo
poden probar que son seres humanos e deste xeito contribuír a
"romper a infinita servidume da muller" e facer que o
sorriso comprensivo, abominábel, dos homes repare nos seus
labios, mais cunha única condición: que leven a súa beleza
como un desafío e un escándalo, como o cabaleiro da espada, que
fascinen durante moito tempo os corazóns e os sentidos ao tempo
que engaiolan o espírito.
Mais, ¡ai!, a conxunción na muller da extrema fermosura e da
audacia intelectual é aínda excepcional, pois o home
disimuladamente vixía por unha parte que a fermosa muller non se
emancipe (que floreza como a súa escrava de luxo, a súa raíña
de beleza, a súa cover-girl). E por outra que a muller
emancipada non poida pretender a beleza. De aí a infelicidade,
infinita, da muller, desde sempre, e hoxe máis que nunca en
medida que se imaxinen, pobriñas, que a liberación está ao
alcance da man, porque esta man encerra unha papeliña de voto e
un talonario de cheques persoal. Non comprenderon, ou
interpretaron mal, a grande esperanza de Rimbaud; el queríaas
humanas mais diferentes, poetas dun modo aínda descoñecido na
terra: "¿Os seus mundos de ideas diferirán dos nosos?
Encontrará cousas estrañas, insondábeis...". De feito, as
máis intelixentes delas non acharon nada que testemuñe a
existencia de outra noite e dun planeta afastado... Limítanse a
adaptaren a lóxica dos homes, as súas obras e os seus tormentos
e só parecen contentas se os seus escritos fan esquecer o seu
sexo. Suzanne Bachelard, a quen se lle preguntaba por que razón
escollera como tema de tese un tema tan arduo (Lóxica formal e
lóxica transcendental en Husserl), respondeu desta estraña
maneira: "Por gosto da abstracción". Non coñezo nada
máis patético que estas palabras, na medida en que podo
experimentar tentacións análogas, sen poder, polo demais, ceder
a elas, xa que o xenio matemático da señorita Bachelard me é
completamente alleo.
Queda aínda ás mulleres unha maneira de se probaren a si mesmas
que cesarán de seren escravas: é no plano do amor, o uso
concreto, simbólico e literario do látigo. Simone de Beauvoir
reivindica para a muller unha posición amorosa que non a humille
máis, nunca máis deitada á vontade do home, senón erguida á
maneira deste, dominadora. Grazas a Simone de Beauvoir, o pracer
dalgunhas mulleres debeu envelenarse, mais, sen dúbida, fixo
sorrir a outras.
Pois sería quizais mellor non desvelar que Madame O, a despeito
do seu envelecimento, a causa del talvez sen que pareza
necesario, non obstante, se aventurar tan lonxe, é unha muller
feliz, satisfeita; efectúa finalmente a súa revancha, chimpa á
cara dos homes a súa escandalosa maneira de
existir. A muller converteuse en obxecto,
consentidor até agora, porque tal é seu pracer fustigado, mais
isto representa unha maneira de agresión respecto os homes: non
se recoñecen xa.
Unha derradeira cousa é conveniente: que nesta postura a muller
non esquece permanecer esencialmente insubmisa. Ciosa do que
aínda non lle foi dado: a liberdade de espirito
(1957)
*Eis a carreira da Sra. Foinant, presidenta da Asociación de
mulleres empresarias: "Cerralleira, vice-presidente do
sindicato nacional de ferratería, primeira muller elixida para a
cámara de comercio de París, oficial da Lexión de honra...
esta criatura eléctrica traballa dazaoito horas ao día, salta
no seu Dyna, abandónao precipitadamente para presidir, a lingua
a colgarlle (sic) e o garfo alegre, banquetes onde fai calar a
tres ou catro ministros aterrados, mais sorrintes, diante de
centos e centos de confiteiras, de merceiras, de directoras de
auto-escola, de empresarias de transporte..."
MERET OPPENHEIM (1913-1985)
A
CRÍA DE GANDO
Os artistas, falo dos homes, levan a vida que lles agrada: e os
burgueses no poder fechan os ollos. Se unha muller fai o mesmo,
os ollos ábrense completamente. Acomódanse ben que mal. Fica
que a muller ten a obriga hoxe de probar polo seu comportamento
cotián que xa non considera aceptábeis os tabús que serven
desde hai milenios para manter as mulleres nun estado de
servidume. A liberdade non se dá a ninguén, hai que tomala.
En toda grande obra, é o ser enteiro que se expresa. E este ser
é tanto de esencia masculina como de esencia feminina. Na Grecia
antiga as Musas inspiraban os grandes homes. É dicir, que o
elemento feminino que portaban nelas concorrían á obra. Tanto
como o elemento espiritual masculino ten a súa parte nas obras
das mulleres. Para designarmos isto non temos aínda nin palabra
nin imaxe. Para facer imaxe, eu diría que o elemento espiritual
masculino nas mulleres está aínda obrigado a levar unha especie
de armadura que o fai invisíbel. Non é todo. Pois despois do
estabelecemento do patriarcado que institúe a desvalorización
de todo o que é de natureza feminina, os homes proxectan sobre
as mulleres a femineidade que levan neles porque pensan que é de
esencia inferior á súa. O resultado é que as mulleres deben
vivir á vez a súa propria femineidade e soportar a que os homes
proxectan sobre elas. Querer que a muller se converta en muller
á potencia dous é querer destanuralizar á muller; é sobre
todo impedirlle crear e unirse nela mesma ao elemento espiritual
masculino que é parte da súa propia natureza.
Nietzsche fala das mulleres como dun produto de cría: "As
mulleres son aínda e sempre gatos e paxaros (observade este
'aínda') ou, no mellor dos casos, vacas" os feitos danlle a
razón. Eis porque as mulleres non se estiman mutuamente.
¿Pódese estimar o que non ten valor? É dicir, que as mulleres
esmagan nelas o seu propio elemento masculino para proxectalo
sobre o home. As mulleres, entendámonos, non deben pensar. ¿A
consciencia de si dos homes, sería tan vulnerável?
As producións espirituais das mulleres, dise, dan unha penosa
impresión. É de abondo para rexeitalas e esquecelas o máis
axiña posíbel. As mulleres, ¿teñen ideas novas? Toda idea
realmente nova é unha agresión. Esta cualidade que é a
agresión contradi absolutamente a imaxe da femineidade que o
home se fai da muller e proxecta sobre ela. Todo isto cambiará
pouco a pouco. Até que chegue, os homes tamén forman parte dun
gando tan singular como os das mulleres e, como elas, fanse deles
mesmos unha imaxe completamente deformada. Non se imaxinan aínda
o que poderían ser se puidesen recoñeceren e integraren neles
mesmos a súa propia femineidade. O mesmo acontece coas mulleres.
Mais elas cambian.
VALENTINE PENROSE (1898-1978)
Home
en
soño varias veces por min asasinado
entre
as túas mulleres man dereita man esquerda
non
obstante libres até os puntos cardinais como brancas
e
a máis bela que ti ocultas
a
outra querida nacente dos grandes ventos flor que amo tanto
ela
tamén azul ceo deus!
*
* * *
Vén
dormir comigo neste leito dos ancestros
Onde
foron elaboradas as forzas da túa beleza viva.
Volta
oh fascinadora. Nas cortinas dos teus cadrís
Onde
me tes axeónllada
Mais
que ningunha outra rogou
Rógoche
me deixes durmir e mesturar aos tempos.
*
* * *
É
así que o sol nas prazas ocupa o místico.
Todos
os nomes. Baixo os ares de Verónica
O
fronte sen cara tapada mostrouse agora.
As
negras saltando desprégano.
As
loiras e as morenas e as castañas tamén.
Os
croios discuten ao lume consigo
Sen
resoar do Ebro e do Segre.
Luz
vive nos teus ollos como podas
Bate
entre as asas do teu silencio
Mentres
se torna ao sangue e á cera.
GISÈLE PRASSINOS (1920)
OS
XERMES
Estaba no leito, fatigada, sentía un formiguexo nas pernas. Un
serán, retirando os meus cobertores, percibín que os meus
membros inferiores estaban completamente encheitos de xermes
densos e que algúns deles, os máis avanzados, despregaban xa
foliolos.
Fixen chamar un médico que prescribiu os remedios ao uso para
este xénero de doenza.
Comezaba a estar mellor cando, subitamente, sentín pena, despois
remorsos, finalmente unha aflición terríbel. Esta vida, que
surxía do meu corpo e que del tiraba as súas xoves
forzas,¿cómo puidera eu recusala, destruíla?
Despois, tentei imaxinar o que podería ser máis adiante, penso
nos vínculos de amizade e de amor que nos unirían
infalibelmente.
ORACIÓN
DO BURÓCRATA
Que cada hora pase rápida no seu pequeno cabalo e entregue a
toda seguinte
O xinete máis esperto
Que o impulso obtido galope ao trote
Gaste dese día os derradeiros minutos
Industriais
Que o animal no limiar do meu dereito ao repouso
Se axeónlle cos zocos do rexeitamento
Teza a súa saliva divirta os instantes
Ou ben que lánguido se adormeza
Mentres eu afastarei as moscas
Do seu ollar hermético